ప్రజా తెలంగాణ
నవంబర్ 3rd, 2008 by డిస్కవర్ తెలంగాణ
-మంచికంటి
తెలంగాణ మట్టినీ మనుషుల్నీ చూసినప్పుడల్లా
నీటి ఒడ్డున తచ్చాడుతున్న సోమాలియాలు గుర్తొస్తాయి
తెలంగాణ భూమి పుత్రుల్ని కదిలించినప్పుడల్లా
కల్లోలమౌతున్న లాటిన్ అమెరికా దేశాలు జ్ఞప్తికి వొస్తాయి
తెలంగాణ చరిత్ర కళ్ళ ముందు కదులుతున్నప్పుడు
పోరాట రూపాలెన్నో పాఠం చెప్పినట్టుగా ఉంటుంది
పాలమూరు కూలీలను చూసినప్పుడైతే
సైబీరియా వలస పక్షులే గుర్తుకు వొస్తాయి
మనిషి మనిషినీ పట్టిపట్టి చూసినప్పుడు
ఎన్నెన్నో కళారూపాలు గజ్జెకట్టి కళ్ళముందు ఆడినట్టే ఉంటుంది
కట్ట మైసమ్మలూ సమ్మక్క సారక్కలను చూస్తుంటే
గ్రామదేవతలే ఇప్పటికీ చేయెత్తి ఆశీర్వదిస్తున్నట్టు ఉంటుంది
నా తెలంగాణ మిత్రులు యాసలో మాట్లాడుతున్నప్పుడు
తాత ముత్తాతల నాటి పరిమళమేదో
నన్ను చుట్టు ముట్టినట్టే ఉంటుంది
ఆ మట్టిలో అడుగు పెట్టినప్పుడల్లా
అడుగడుగునా రక్తం చిందించిన అడవి గుర్తుకొచ్చి
త్యాగాల భూమికి తల ఆనించి నమస్కరించాలనుంటుంది
తెలంగాణ సోదరులెవరు గళమెత్తినా
సంస్కృతీ సాంప్రదాయాలన్నీ జరజరా పాకుతూవొచ్చి
ఆత్మీయంగా అల్లుకున్నట్టే ఉంటుంది
చిత్రకారుల కుంచెల గుండా ప్రాణం పోసుకున్న చిత్రాలు
కళ్ళ ముందు కదిలినప్పుడల్లా
అమ్మో అయ్యో కలలో నుండి నడిసొచ్చి
ఆప్యాయంగా తల నిమురుతున్నట్టే ఉంటుంది
తరతరాల పోరాట చరిత్రలో తల మునకలైనప్పుడల్లా
రాతిగుండును భుజాలకెత్తుకున్న హెర్క్యులస్ కళ్ళముందుకొస్తాడు
అమ్మలారా అక్కలారా అన్నలారా తమ్ములారా
మీ పోరాట స్ఫూర్తికి వెయివేల దండాలు
(Courtesy : AndhraJyothy, Vividha; 3 Nov 2008)
